श्रीक्षेत्र ओझर, तिर्थक्षेत्र

श्री विघ्नेश्वर गणेशाची पौराणिक कथा-
पुरातन काळाची कथा आहे. हेमवती नावाची नगरी होती. तेथे अभिनंदन नावाचा राजा राज्य करीत होता. राजा मोठा महत्वाकांक्षी, सत्ता व संपत्ती याचा लोभी होता. मोहाने माणसाला आपल्या ताकदीचा विसर पडतो. तसे अभिनंदन राजाच्या बाबतीत घडले. एकदा त्याला आपण इंद्रपद मिळवावे असे वाटू लागले. इंद्रपद मिळवायचे म्हणजे यज्ञ करणे जरुरीचे होते. मनात आले आणि सत्तेच्या लोभाने मदांध झालेल्या राजाने इंद्रपद प्राप्तीसाठी यज्ञ सुरु केला. यज्ञात सर्व देवदेवतांसाठी योग्य ती आहुती दिली जाणार होती. परंतु इंद्राचे राज्य घेण्यासाठी यज्ञ असल्याने इंद्रासाठी मात्र तशी आहुती नव्हती. नारदमुनींना हे समजले. ते धावतच इंद्राकडे गेले.

इंद्राची प्रार्थना करुन नारद इंद्राला म्हणाले इंद्रदेवा तुम्हांला पृथ्वीवरची हकीकत कळली का काय म्हणता नारदमुनी मला तर कसलीही गंधवार्ता नाही. इंद्राने उत्तर दिले. तेव्हा नारदमुनिंनी अभिनंदन राजाच्या यज्ञाची व तो इंद्राचा या यज्ञात योग्य तो सन्मान करीत नसल्याची हकीकत वर्णन करुन सांगितली. ती वार्ता ऐकली आणि इंद्र संतापला. त्याच्या तळपायाची आग मस्तकाला भिडली. अभिनंदन राजाला काय करु आणि काय नको असे त्याला झाले. इंद्राने काळाचे स्मरण केले. सत्कार्यात, पवित्र गोष्टीत विघ्न आणणे ही काळाला अतिशय आवडणारी गोष्ट. काळाने तात्काळ विघ्नासुराचा अवतार धारण केला. विघ्नासूर पृथ्वी तलावर आला सर्व वैदिक कार्याचा नाश करण्याचा सपाटा त्यांने लावला. सर्व देव भयभीत झाले. तेव्हा सर्व देव श्रीगणेशाला शरण गेले. त्यावेळी श्रीगणेशाचे पराशर ऋषिंच्या आश्रमात वास्तव्य होते. श्री गणेशाने देवांना अभय दिले. आणि पार्श्वपुत्राचे रुप घेतले. आपला मुलगा प्रत्यक्ष श्रीगणेश आहे, हे पार्श्वपुत्र आणि त्यांची पत्नी दीपवत्सला यांना ठाउक नव्हते. तेव्हा आपल्या पुत्राला विघ्नासुराशी लढण्यास पाठवायला ते दोघे तयार नव्हते. शेवटी श्रीगणेशाने त्यांना सगळी हकीकत सांगितली व तो पार्श्वपुत्र विघ्नासुराशी युध्द करण्यास निघाला.

श्रीगणेश व विघ्नासूर यांचे तुंबळ युध्द झाले. काळरुपी विघ्नासुराने अनेक रुपे बदलली, परंतु अखेरीस श्रीगणेशाने त्याला पकडले. विघ्नासूर श्रीगणेशास शरण आला. त्याने अभय मागितले. श्रीगणेशाने त्याला सांगितले ठीक आहे. तुला जिवदान देतो. मात्र जेथे माझे भक्त माझी पूजा-अर्चा, स्मरण करत असतील तेथे तू असता कामा नये. विघ्नासूराने ते कबूल केले. परंतु पुन्हा एक विनंती करीत म्हटले श्रीगणेशा तुझ्या नावाप्रमाणे माझं नांव असावे, अशी इच्छा आहे.
श्रीगणेश म्हणाले तथास्तु. तेव्हा पासून श्रीक्षेत्र ओझरचा श्रीगणेश विघ्नेश्वर, विघ्नहर म्हणून ओळखला जाऊ लागला. भाद्रपद शुध्दचतुर्थीस देवांनी नैऋत्येला विघ्नेश्वराची स्थापना केली. ही घटना श्रीक्षेत्र ओझर याठिकाणी घडली. तो श्रीक्षेत्र ओझरचा विघ्नेश्वर आज संपूर्ण महाराष्ट्राचे श्रध्दास्थान आहे.